كريم العدل:«كان ياما كان» حكاية إنسانية قبل ما يكون قضية.. والنجاح على السوشيال ميديا كرم من ربنا| حوار

بعد النجاح الذي حققه مسلسل «كان ياما كان» وجذب الأنظار منذ حلقاته الأولى، تحدث المخرج كريم العدل في حواره مع بوابة «دار الهلال» عن كواليس العمل، وكيفية اختياره للمشروع، ورؤيته الإنسانية للشخصيات، بعيدًا عن الجدل حول القضايا التي يناقشها المسلسل، وأكد كريم العدل أن ما جذب اهتمامه في البداية كان أسماء صناع العمل، وعلى رأسهم النجم ماجد الكدواني والكاتبة شيرين دياب، مشيرًا إلى أنه تعامل مع المسلسل من منظور إنساني بحت.

-المسلسل يتناول قضية واقعية وحساسة.. ما هو تركيزك أثناء التحضير؟
أنا ما بصيتش للموضوع من زاوية القضية نفسها، لكن ركزت على الجانب الإنساني للشخصيات. ده كان أهم شيء بالنسبة لي، إننا نحكي عن البشر ومشاعرهم.

-هل يمكنك التوسع في الجانب الإنساني للشخصيات؟

أكيد. مثلًا شخصية مصطفى، هو رجل بداخله طفل، بيحاول يتمسك بكل ما هو قديم ويرجع كل حاجة زي ما كانت، حتى أدق التفاصيل،أما شخصية داليا، فهي محبوسة في قوقعة سنين طويلة، وفجأة قررت تتحرر من كل ده، وكان لذلك تأثير على من حولها. وشخصية فرح، اللي استخدمها الآخرون في صراعات مش ليها علاقة بيها، كل ده بالنسبة لي بُعد إنساني قبل أي قضية.

-هل المسلسل أنصف الرجال، كما يقول البعض؟

الحقيقة أنا ما بصيتش للموضوع من زاوية إنصاف الرجال أو النساء. في النهاية إحنا بنتكلم عن بني آدمين. لو مصطفى كان هو اللي عايز يطلق بسبب اكتئاب، ما كانش هيفرق معايا. كلنا بشر، والفكرة هي أننا نحكي عن تجارب إنسانية، مش تحديدًا جنس أو طرف.

-هل كان هناك اهتمام بالتنوع في الشخصيات؟
أكيد، عندنا مثلًا شخصية سمر وزين، هو اللي عايز يتجوز وهي اللي مش عايزة. حتى ده طبيعي، وبيأكد إن نوع الشخص مش دايمًا يحدد مين الصح أو الغلط، لكن اللي يهم هو التعامل الإنساني وفهم الدوافع.

-كيف كان رد فعل الجمهور على مواقع التواصل الاجتماعي؟ وهل توقعت هذا النجاح؟

الحمد لله، ده كرم من ربنا ردود الأفعال كانت ممتازة جدًا،بصراحة، أنا ما بحبش أتوقع حاجة، كل اللي نقدر نعمله نعمله، والباقي بيد ربنا.

-المشاهد لاحظت اهتمامك بالتفاصيل.. هل كان هذا جزءًا من فلسفتك الإخراجية؟

أكيد، التفاصيل الصغيرة تصنع فرق كبير،كل تفصيلة في المشهد بتساعد المشاهد على فهم الشخصيات والتفاعل مع الحكاية بشكل أعمق.