كشفت الفنانة كارمن سليمان، عن كواليس إصدار ألبومها الجديد "أصح غلطة"، الذي تطرح أغانيه بشكل متتابع، مشيرة إلى أن خطوة إصدار ألبوم كامل لم تكن سهلة، لكنها تعتبرها انطلاقة مختلفة في مسيرتها.
أوضحت كارمن في تصريحات صحفية: "فضلت فترة طويلة أقدّم أغاني منفردة، وكانت خطوة الألبوم محتاجة مجهود واختيارات دقيقة علشان يطلع في شكل متكامل، ورغم أن الخطوة جت متأخرة، لكن فعلاً كل تأخيرة وفيها خيرة، وحاسة إن البداية الحقيقية ليا كمطربة ألبومات بتبدأ من هنا".
وأضافت: "قررت أطرح الأغاني على فترات، لأن ده أقرب لطريقتي المعتادة، وعلشان كل أغنية تاخد فرصتها، ومفيش واحدة تظلم أو تعدي على الناس من غير ما تاخد حقها في السماع".
وتحدثت كارمن عن أجواء المنافسة في موسم صيف 2025، قائلة: "كنت متخوفة من الزحمة، لأن في عدد كبير من الأغاني نازل في نفس الوقت، لكن المنافسة الشريفة حاجة كويسة، وبتخليني أتحمس أكتر، وشايفاه ميزة حقيقية هو إن مفيش مطرب بيشبه التاني، وكل واحد ليه لونه وطريقته، فده بيخلق تنوع بيريّح المستمع".
وعلى جانب آخر، تستكمل كارمن سليمان طرح باقي أغاني ألبومها "أصح غلطة"، والذي تتعاون فيه مع الشاعر أحمد المالكي، والملحن كريم نيازي، والموزع شادي ديفيد، وإخراج ريم عيد.