كشف الفنان الشاب آدم الشرقاوي عن بعض تفاصيل تتعلق بحياته الخاصة وذلك خلال تصريحات تليفزيونية، مشيراً إلى تفاصيل الأزمة الصحية والنفسية التي مر بها خلال العامين الماضيين، موضحًا أنه دخل في مرحلة اكتئاب بسبب التعليقات السلبية عبر مواقع التواصل الاجتماعي.
وأوضح آدم الشرقاوي ، خلال حواره مع الإعلامية منى الشاذلي، في برنامجها معكم: بعد ما خلصت فيلم شماريخ دخلت في اكتئاب لأني مكنتش واثق في نفسي ولا كنت شايف نفسي ممثل شاطر، وكنت بشوف بوستات على السوشيال ميديا إن العربي بتاعي مش مظبوط، فقلت هو أنا ينفع أمثل ولا لأ؟، أنا كنت عايز أستقر في مصر خاصة أن أهلي كانوا برا ومعرفش حد هنا غير الفريق بتاعي اللي بشتغل معاه، كنت محتاج صحاب وأهلي، كنت وحيد وحواليا ناس محبطة، كنت محتاج شلتي اللي بشوفهم وبقعد معاهم كل يوم.
وأستكمل "الشرقاوى" حديثه قائلاً:" ظهرت عندى مشكلة الكلى ومكنتش أعرف، وكان في فترة وزنى بينزل وبيزيد بسرعة، ومكنتش فاهم ليه، برغم أن كنت بنزل جيم ولقيت جسمى مليان مايه وكمان وزنى مش بينزل، وبسبب كده دخلت مرحلة الاكتئاب، مكنتش بشوف حد نهائى، وكانت الناس بتكلمنى فى التليفون وأنا مكنتش سامعهم لأن ذهنى كان مشوش وقتها.
وتابع آدم الشرقاوي حديثه خلال الحلقة قائلاً:" مكنتش بقول لحد على اللي كان بيحصلي علشان ميقولوش عليا ضعيف أو يقولوا إني مبعرفش أحل مشاكلي، أنا طبعى عنيد ومعرفتش أسأل حد يساعدني، في حاجة فيا أنا مش فاهمها ومكنتش عايز أعرف حد أن في حاجة غلط فيا لأني مكنتش عايز دي تأثر على شغلي وده تفكير غلط، معرفتش أقول لأي حد ساعدوني، كنت بفكر أني أنا اللي عملت كده
في نفسي.