عقب السيناريست محمد صلاح العزب، مؤلف فيلم سفاح التجمع، على حالة الجدل التي أثيرت مؤخرًا حول العمل المقرر طرحه بدور العرض السينمائي خلال موسم عيد الفطر.
وقال العزب عبر حسابه الرسمي على موقع فيسبوك: "مع كامل الاحترام لكل الآراء، لكن الناس اللي معترضة على وجود عمل فني بعنوان سفاح التجمع، وبتسأل هو ليه وإزاي وإيه الفايدة من تقديم شخصية سفاح، هل ده أول عمل في التاريخ يتناول شخصية إجرامية، عمركم ما سمعتوا عن آلاف الأفلام والمسلسلات في تاريخ السينما والمسرح والتلفزيون والمنصات عن مجرمين؟! ولا كل مرة هتستغربوا وتندهشوا نفس الاندهاش؟!".
وأضاف: "والكلام بتاع ما تعملوا عن شخصيات تاريخية أو علماء أو شخصيات مفيدة، طب ما هو برضه ده بيتعمل بشكل دوري، وغالبًا ما بيلاقيش نجاح ولا رواج جماهيري، بما يعني إنكم مبتتفرجوش على الأعمال دي أصلًا".
وتابع: "وفكرة إن لما المشاهدين يشوفوا السفاح في فيلم، الناس كلها هتتحول لسفاحين عشان يقلدوه، ده برضه منطق غريب؛ ما طول الوقت الأعمال الفنية بتعرض مجرمين وقتلة وسفاحين، ودكاترة وضباط ومحامين وسواقين أوبر، وعادي جدًا، والمشاهد مش بالسذاجة إنه كل ما يشوف شخصية يقلدها".
واختتم العزب حديثه قائلاً: "المفاجأة إن الفن بينقل من الواقع مش بيسبقه، وفي المجمل إحنا بناخد نماذج حقيقية، وإحنا اللي بنقلدها مش هم اللي بيقلدونا. قليل من المنطق، حياكم الله. وإن شاء الله المشروع القادم هعمل فيلم عن الدكتور مجدي يعقوب، أطال الله في عمره".
ويشارك في بطولة الفيلم عدد من الفنانين، بينهم أحمد الفيشاوي، انتصار، جيسيكا حسام الدين، مريم الجندي، سينتيا خليفة، وصابرين، إلى جانب ظهور الفنان نور محمود كضيف شرف في أحد مشاهد داخل النيابة.