كشف الفنان ماجد الكدواني أنه أب لطفلين هما يوسف وساندرا، مؤكدًا أن العلاقة داخل أسرته تقوم على الصداقة والحوار.
وقال خلال لقائه في برنامج "الصورة" مع الإعلامية لميس الحديدي على قناة النهار: "فكرة العيلة مهمة جدًا.. بحب نعيش في سلام، حتى في القرارات الحاسمة لازم يكون في تشاور وهدوء، لكن في لحظات معينة لازم الأب يكون حاسم".
وضرب مثالًا على ذلك قائلاً: "لما بنتي ساندرا مرضت وهي في المدرسة، قررت أنقلها فورًا رغم إنها كانت زعلانة علشان هتسيب أصحابها، لكن القرار كان لازم يتاخد لمصلحتها. نفس الشيء حصل لما ابني سافر للدراسة بره، الموضوع كان صعب عليا جدًا، وعيطت بيني وبين نفسي، لكن قبلت لأنه في صالحه.. والخمس سنين عدّوا بالعافية".
وعن علاقته بأولاده قال ماجد الكدواني إنه أصبح أكثر هدوءًا وتوازنًا مع مرور الوقت، موضحًا: "زمان كنت عصبي جدًا، وسريع الغضب والانفعال.. كنت ممكن أتعصب على أقل حاجة وأكسر حاجات، وده كان بسبب قلة الخبرة في الحياة، كنت عايش حياة صاخبة".
أما عن التحول في شخصيته، فكشف قائلاً:"اللي غيرني فعلاً هو الخبرة وتقييم النفس. حد في مقام أبوي قالي نظرية اسمها (الصباع)، ودي غيرت حياتي. النظرية بتقول إننا دايمًا بنلوم غيرنا ونقول: أنت اللي عصبتني، وأنت اللي خلتني أتصرف كده، لكن الحقيقة إن القرار قرارك وإنت اللي بتختار رد فعلك. لما استوعبت ده، بدأت أواجه نفسي وعيوبي وأتغير فعلاً".
واختتم حديثه قائلاً:"لما اتغيرت وغيرت من نفسي.. الكل ارتاح حواليّ، وأنا كمان ارتحت".