كشف الفنان أحمد فهمي عن ملامح رحلته الشخصية وكفاحه منذ الطفولة، مؤكدًا أنه لم ينشأ في ظروف مرفهة، وأن طريقه إلى النجاح كان مليئا بالتحديات والعمل المبكر.
وقال أحمد فهمي، في تصريحات تليفزيونية، إنه بدأ العمل في سن مبكرة، موضحًا: «اشتغلت من عمر تسع سنين، والحلم وقتها كان بسيط جدا، إني أشتري جزمة تمنها 25 جنيه، وده كان وأنا بدرس في المعهد العالي للموسيقى الكونسرفتوار، لأن والدي كان بيجيبلي جزمة واحدة في السنة».
وأضاف الفنان مازحًا: «دلوقتي عندي عقدة من الجزم، وبجيب جزم كتير ومش بلبسها».
ووجه أحمد فهمي مجموعة من النصائح للشباب الراغبين في تحقيق النجاح، مؤكدًا أهمية التركيز على الهدف دون الالتفات للمقارنات، قائلًا: «حط نقطة عايز توصلها وماتبصش حواليك، وماتسألش ليه ده عمل كده ووصل لكذا، إنت اشتغل على نفسك وامشي في طريقك».
وتابع: «لو حسيت بالتعب أو إن حقك متأخر، بص وراك وشوف إنت مشيت قد إيه، هتلاقي نفسك قطعت مشوار كويس، ومش شرط تنط 300 درجة مرة واحدة».
وشدد فهمي على أن الاجتهاد هو الأساس، قائلًا: «ربنا بيدي كل بني آدم اللي يستحقه في التوقيت المناسب، المهم تشتغل وتعمل اللي عليك. حتى لو حققت 20 درجة أو 5 درجات ده كويس، مش لازم أبقى أحسن واحد في الدنيا، المهم أكون عملت اللي عليا وبمجهودي».
وأكد أن الإيمان بالعمل والصبر هما الطريق الحقيقي للوصول إلى النجاح والاستقرار.