قال الإعلامي د. عمرو الليثي في مقدمة برنامج "أبواب الخير" عبر إذاعة راديو مصر ، في حياتنا اليومية، بنقيس كل حاجة بالنتيجة: قد إيه كسبنا؟ قد إيه خسرنا؟ قد إيه الناس شكرت؟ لكن الحقيقة فيه ميزان تاني، مختلف، وهو ميزان ربنا. وهنا بيظهر اسم من أسماء الله الحسنى بيريح القلب ويصحح المفاهيم، وهو اسم الشكور.
وتابع اللي بينظر للسعي قبل النتيجة، وللمحاولة قبل النجاح، وللنية قبل الإنجاز. اللي مش بينسى معروف، ومش بيهمل سعى، ومش بيضيع نية. اللي بيشوف الجهد قبل النتيجة، وبيشوف النية قبل العمل.
الله الشكور لا يعطيك بقدر ما عملت، لكن بقدر ما صدقت. عمل صغير بإخلاص ممكن يفتح لك باب كبير من الخير. وعمل كبير من غير نية ممكن يمر بدون أي أثر.
ركعة آخر الليل، كلمة طيبة، نية صادقة، صدقة في السر، دعاء من القلب، كل ده محفوظ عند الشكور، اللي بيدي لكل واحد على قد صدقه وعزيمته ونيته.
ووجه الليثي النصيحة الرمضانية .. أنتم عارفين إن أكتر حاجة بتضيع روح رمضان مش التقصير في العبادة، لكن التقصير في الأخلاق. صيام من غير صبر، قيام من غير رحمة، دعاء من غير نية صافية، كل ده محتاج مراجعة.
خلي رمضان يعلمك تسمع أكتر ما تتكلم، تسامح بدون تفكير، تعتذر من قلبك. وافتكر دايمًا إن ربنا شايفك.
ولازم نعرف إن رمضان فرصة نطلع منها بقلب أهدى، ونفس أرقى، وأخلاق تعيش معانا بعد ما الشهر يخلص.
وعلي جانب آخر يقدم البرنامج خلال شهر رمضان رحلات عمرة، ومساعدات مالية ، كما يقدم عدد كبير من المشروعات الصغيرة وأطراف صناعية وكراسي كهربائية.
كما يساهم البرنامج في الإفراج عن عدد كبير من الغارمات ، ويلعب البرنامج دورا مهما في علاج غير القادرين وادخال البهجة والسرور علي قلوبهم من خلال تلقي الاتصال الهاتفية بشكل مفاجأة علي الهواء طوال شهر رمضان.
فكرة البرنامج تأتي في إطار دعم أهالينا، من خلال التواصل مع المستمعين علي الهواء مباشرة وتلبية احتياجات المواطنين في نفس اللحظة ومتابعي البرنامج.
يذاع برنامج أبواب الخير يومياً خلال شهر رمضان في الثالثة عصرا عبر اثير إذاعة راديو مصر والإعادة في السابعة مساءً بعد الإفطار .