أعلن المخرج محمد سامي انتهاء النزاع القضائي بينه وبين الفنانة عفاف شعيب، مؤكدًا صدور أحكام نهائية لصالحه في جميع القضايا التي رفعتها ضده خلال العامين الماضيين.
كتب المخرج محمد سامي عبر حسابه الرسمي على فيسبوك: «مدام عفاف شعيب بقالها سنتين بترفع عليّ قضايا وبتخسرها، والنهارده كانت آخر قضية وبرضه خسرتها.
وأوضح: مش فاهم ليه مُصرّة تِقاضيني من غير وجه حق، وتقول إني سبتها وغلطت فيها في برنامج تلفزيوني، وده محصلش.
وتابع: المحاكم حكمت إن ده محصلش بأحكام نهائية، وسببت أحكامها إن مفيش أي تجاوز أو إساءة حصلت مني ناحيتها.
وأضاف: كل القضايا الجنائية والمدنية كانت في صالحي وفي كل درجات التقاضي، وأصلاً الحلقة اللي بتقول إني غلطت فيها موجودة أونلاين وأي حد يقدر يشوفها.
وأكد: أنا مستحيل أغلط في ست في سن أمي أو أكبر، وكمان فنانة كبيرة وليها تاريخها، دي أول مرة أتكلم عن الموضوع ده، لأني كنت مستني لما تخسر القضايا كلها وبعدين أطلع أتكلم.
واختتم: ودلوقتي بناقش مع المستشار القانوني أستاذ شعبان سعيد نعمل إيه الفترة الجاية، يا إما ناخد إجراءات قانونية ونعمل قضايا تعويض بسبب التشهير وإساءة السمعة، يا إما نقول عفا الله عما سلف، ونكبر دماغنا، وما نزودش عليهم الهم، ونسامحهم ونتعشى مع بعض بره ونعزمهم على ريش وبيتزا».