علقت الفنانة لقاء الخميسي للمرة الأولى على أزمة زواج زوجها حارس المرمى السابق محمد عبد المنصف، مؤكدة عودتهما مجددًا بعد تجاوز الخلافات الأخيرة، ومشددة على تمسكها ببيتها وأسرتها، وحرصها على الحفاظ على عش الزوجية الذي بذلت سنوات من عمرها في بنائه، مهما كانت التحديات.
وكتبت لقاء الخميسي منشورا عبر حسابها الشخصي على موقع تبادل الصور والفيديوهات إنستجرام، قالت فيه:«الدنيا بتختبرنا دائمًا وأبدًا، أيام بتسعدنا وأيام بتبعدنا وتزعلنا وتجرحنا، وبنتوه مع نفسنا، الحكمة بتظهر من قلب الحزن.. وبنقعد نفكر إيه الصح وإيه الغلط وهل اللي عدينا بيه شر ولا خير؟».
وأضافت: «ومع الوقت، ولما النفس تهدى والعقل يفكر والقلب يدق، بنكتشف إن كلنا بنغلط وبنتوه شوية في وسط الزحمة، في ناس بتغلط وتكمل في الغلط، وفي ناس بتغلط وترجع لحكمتها وتندم وتصحح الخطأ،خطّائين وخير الخطّائين التوابين، مفيش حد ما بيغلطش، بس القوي الحقيقي بيعترف بالغلط وبيرجع لصوابه، ربنا فتحلنا باب المغفرة والسماح».
كما وجهت الفنانة الشكر لكل من دعمها خلال الأزمة قائلة: «شكرا من قلبي لكل إنسان دعمني ووقف جنبي وطبطب عليا، وشكرا لكل أصدقائي المقربين وكل من دعمني من أصدقاء السوشيال ميديا اللي نوروا حياتي بالمحبة ودعوا لي».
واختتمت لقاء الخميسي حديثها: «أسهل حاجة في الدنيا هدم البيوت العمرانة، وأقوى حاجة إننا نحافظ على حياتنا ونحارب على بيوتنا وأولادنا بالحب والسلام. كلنا بنغلط وبنندم ونرجع لصوابنا ونبدأ من جديد بشغف وحب وسلام وراحة بال. لكل ست وربة منزل حافظي على بيتك وعيلتك بكل قوتك، وأوعي تدي الفرصة لأي حد يهدم بيت العيلة».